|
|
|
|
|
|
|
Vultà à l'indici
|
U Babbu di a Patria Pasquale Paoli, pruclamatu Babbu di a Patria è Ginirali di a Nazioni hà marcatu bè a storia di a Corsica. In capite à a Custituzioni corsa, hà cuntribuitu à l' elaburazioni di quidda di i Stati Uniti ; sò chjamati mondi cità americani par via d' eddu : Paoli City in Colorado, in Indiana, in Pennsylvania... Quandu nasci Pasquali Paoli, u 6 d' Aprili di u 1725, in Stretta, vicinu à Merusaglia, a Corsica hè sempri occupata da i truppi genuvesi. Ci vularà aspittà deci anni, u 30 di Ghjinnaghju di u 1735, da chì a Corsica sighi dichjarata indipendenti da a Cunsulta d' Orezza à tempu à u votu di a prima Custituzioni corsa, prima Custituzioni dimucratica muderna. Hè affidatu u puteri legislativu ad un' assemblea cumposta da deputati eletti da u populu è u puteri esecutivu, eddu, hè assignatu à una Giunta di sei membri eletti da l' assemblea. Hè elettu Ghjacintu Paoli, babbu di Pasquale, diputatu ed hè membru di a Giunta. Ma in u 1739 hè torna scunfitta a Corsica da Genuva è sò custretti i Paoli à l' esiliu. Ascosu in Napoli, Pasquale Paoli seguitarà i corsi à l' università di quallà, ind' eddu compii brillamenti i so studii, pà avviassi ver d' una carriera militari. Hè numinatu, dopu, sottutinenti à u reggimentu reali stabilitu in Sicilia. Bench' in esiliu, u giuvanottu Paoli suita cù primura fatti è mossi in
Corsica è da chì u frateddu Clemente è parechji
nobili isulani li chersini di vultà, accunsenti. Da tandu chì Pasquale Paoli ghjunghji à puteri, disordini è anarchia dumineghjani in Corsica è li ci aspetta un da fà trimenti. À partasi da Nuvembri di u 1755, farà di l 'isula un Statu dutatu d' una Custituzioni, d' un' amministrazioni, d' una ghjustizia è d' un' armata. Hè sultantu in u 1761 chì a Cunsulta di Viscuvatu dicidarà di batta muneta. Tutt' apparu à a so opara pulitica, Pasquale Paoli apri mondi scoli è crea in Corti, l' Università di Corsica. Ni faci listessu pà l' icunumia, favurendu l' agricultura, l' industria è u cummerciu esternu. Crea un' amministrazioni incaricata di a cultura di i tarreni ed introduci u pomu in Corsica. Pasquale Paoli sviluppeghja u sfruttamentu di i mini di ramu è di piombu è fonda u portu d' Isula Rossa. Sott' à a so autorità a Corsica duventa una Ripublica ammirata da mondi paesi. |
|
|
|
